ВМРО – ДПМНЕ до Државна Комисија за Спречување на Корупција поднесе нови приговори за кршење и на изборниот законик и на законот за антикорупција и судир на интереси, соопшти денеска партискиот портпарол Наум Стоилковски.

Од партијата велат дека очекуваат од Антикорупциската итно да преземе мерки за повеќе лица кои извршуваат повеќе јавни овластувања, односно се дел и од управни и надзорни одбори, додека извршуваат функции како државни секретари, директорски функции, општински советници, или пак други функции, за што како што рече Стоилковски, тоа според членот 77 е судир на интереси, за што ДКСК мора да реагира и да извести.

До ДКСК, како што кажа Стоилковски, поднесоени се нови приговори за кршење и на изборниот законик и на законот за антикорупција и судир на интереси.

1. „Спротивно на законите, во изборен период, на 4-ти април, при започната изборна кампања, платежната агенција, односно агенцијата за финансиска поддршка на земјоделството соопштува дека се исплатени 77 милиони денари – или над 1 милион и 250 илјади евра – на над 2.000 лозари. И за ова ресорниот министер се пофали преку медиумите. Во случајот употребени се државни пари за исплата на долг на приватни фирми – значи не станува збор за субвенции или за тековни исплати! Ова е класично кршење на членот 8-А од изборниот законик и членот 34 од законот за спречување на корупцијата и судир на интереси. Класичен случај на поткуп на земјоделци“!

 

2. “Поднесен е приговор повторно за информација од медиумите од трети и четврти април, дека од 15-ти април започнува физичко обезбедување во училиштата на трошок на општината Гази Баба. Веста гласи дека по иницијатива на Градоначалникот на Гази Баба, по негова иницијатива ги ослободува родителите од плаќање. Што е повторно класично кршење на членот 8-А од изборниот законик и членот 34 од законот за спречување на корупцијата и судир на интереси – односно, во предизборен период, по распишани избори, општината носи одлука за исплати од сопствени средства кои не се редовни“.

 

3. „Следува нов приговор, ВД градоначалникот на Ново Село – каде има и вонредни локални избори – дава согласност за вработувања на 10 работници. Ова е исто така спротивно на двата закони – членот 8А од Изборниот и членот 34 од антикорупцискиот закон“.

 

4. „Општина Штип ги ангажирала пожарникарите да делат дрва на социјално загрозените лица од градот, и тоа оди во локалните медиуми! Среде кампања донесена е противзаконска одлука, со кршење на двата закони, за донација каде што се гледа како поткуп на гласачи и во тоа се злоупотребени и Општината и „Македонија Пат” и „Македонски Шуми”, но и Противпожарната единица на Општина Штип. Оваа донација, можело да се спроведе пред распишување на изборите или по завршување на изборите“.