Во Белград денеска престојува рускиот претседател Владимир Путин, кој ќе ја оствари 14. средба со српскиот претседател, Александар Вучиќ. Ова ќе биде втора меѓусебна средба на Вучиќ и Путин одржана во српската метропола.

Пред оваа, како што е најавена „историска посета“, Белград се подготви со досега невидени мерки на безбедност, со околу 7.000 припадници на сите безбедоносни служби и околу 250 руски специјалци, како и три српски мига кои ќе се грижат за нивната безбедност.

На граѓаните на Нов Белград им е препорачано да не излегуваат на терасите на нивните домови, да ги тргнат автомобилите, ќе биде изменет режимот на сообраќајот во одредени делови на Белград. Секое вид движење по трасата по која ќе се движи Путин, ќе биде забранет како и објектите кои тој ќе ги посети, заварени се шахтите, а ќе бидат распоредени и повеќе снајперисти.

Рускиот претседател ќе се вози низ белградските улици со својот „бункер на тркала“ – аурус, еден од најзаштитените и најбезбедни автомобили во светот, специјално донесен од Москва за оваа посета.

Руските разузнавачи се веќе во Белград, со технологија за спречување на напади со дрон, а најголемото обезбедување ќе биде кај храмот Свети Сава, каде што се очекува обраќање на рускиот претсетел. За таму, покрај српскиот патријарх Иринеј, највено е и присуството на десетици илјади граѓани и подржувачи на Путиновата политика.

Покрај претседателот Владимир Путин, во Белград се најавува и присуство на шефот на руската дипломатија, Сергеј Лавров, како и на првиот човек на агенцијата за вселенски истражувања, „Роскосмос“, Димитриј Рогозин. Покрај нив, во руската делегација ќе бидат и повеќе министри, генералниот директор на „Руски железници“, ректори на три поголеми универзитети…

Од српска страна, покрај претседателот Вучиќ, најавено е присуството на премиерката Ана Брнабиќ, вицепремиерот и шеф на дипломатијата Ивица Дачиќ, министерот за внатрешни работи Небојша Стефановиќ и други министри.

Како што најави српскиот претседател Александар Вучиќ, со Русија ќе бидат потпишани 21 договор, вредни повеќе стотици милион евра, на полето на инфраструктурата, железниците, земјоделието, иновациите, образованието, дигитализацијата, реновирањето на хидроелектраната „Ѓердап 2“…

Во поглед на енергетиката, се очекува да стане збор за приклучување на Србија на гасоводот Турски тек, а во поглед на воената соработка испораката на тенковите Т-72 и против-воздушните системи.

Централна тема на средбата, секако, ќе биде Косово и поддршката што и ја дава Русија на Србија, можното вклучување на Русија во косовскиот дијалог и воено-политичката неутралност на Србија, во поглед на НАТО.