По информацијата на Пресинг Тв дека специјалната јавна обвинителка Катица Јанева испратила барање до нејзините колеги обвинители да ги предадат предметите и материјалите до јавниот обвинител Љубомир Јовески, СЈО објави соопштение, што го пренесуваме во целост:

Во текот на вчерашниот ден до Специјалното јавно обвинителство од страна на Основниот кривичен суд Скопје доставено е полномошно, кое Катица Јанева преку КПУ „Затвор Скопје“ го доставува до ова Јавно обвинителство. Со полномошното Јанева ги овластува обвинителите во ова Јавно обвинителство да ги предадат на Јавното обвинителство на РСМ предметите кои се водат во ова Јавно обвинителство и тоа: кривичните предмети во судење, во истрага и во предистрага.

Имајќи го предвид законот за СЈО и одредбите за  автономија на Обвинителството, во текот на денешниот ден ќе биде испратен допис до Јавното обвнителство на РСМ со цел запознавање на Јавниот обвинител на РСМ со ваквото полномошно, по што ќе биде донесена одлука за евентуално понатамошно постапување, стои во соопштението.