Фросина Ременски поднесе кандидатура за претседателка на СДСМ

Поранешната пратеничка и потпретседателка на СДСМ, Фросина Ременски денеска објави дека поднесува кандидатура за претседател на СДСМ.

-Ги предадов сите документи за самокандидирање за претседател на СДСМ. Очекувам во следниот период, согласно роковникот, да се утврдат кандидатите, со што би почнале активностите за претставување на кандидатите пред членовите, активистите и симпатизерите на СДСМ, изјави Ременски пред партиското седиште.

Вели дека одлуката ја донела врз основа на нејзиниот целокупен општествено-политички и партиски активизам.

По поднесување на кандидатурата Ременски во изјава за новинарите Пред седиштето на партијата Ременски изјави дека преку личен пример сака да покаже дека жените можат и знаат. Додава дека очекува поддршка од колешките во партијата и од сите членови, кои како што вели, го знаат нејзиниот карактер и конзистентност во ставовите.

-Очекувам овој период СДСМ да го искористи за вистинско обединување на членството, за консолидација на партиските редови, за намалување на разликите меѓу одредени структури во рамките на партијата, затоа што многу е важно каква визија ќе промовираме. Мојата визија за СДСМ во следните пет години е победник во сите процеси пред коишто се исправен, изјави Ременски.

Денеска и Димитар Ковачевски најави дека официјално ќе ја поднесе кандидатурата за претседател на СДСМ во партиското седиште.

Партијата ги повика сите заинтерсирани да се самокандидираат, а постапката започна на 27.11.2021 и ќе трае седум дена.