Асоцијацијата на спортски обложувалници (АСОМ) информира дека согласно со новите мерки за заштита од КОВИД-19 и ограничување на работното време на угостителските објекти, и спортските обложувалници нема да нудат угостителски услуги по 23 часот.

– Во целост ја разбираме епидемиолошката состојба во земјата и даваме поддршка на институциите во борбата за справување со вирусот. Откако со одлука на Владата, спортските обложувалници од 13 мај повторно ги отворија своите уплатно-исплатни места, работиме во целост согласно со протоколите пропишани од Комисијата за заразни болести и ниту еден наш објект не е затворен заради Ковид-19. Продолжуваме доследно да се придржуваме до протоколите, грижата за нашите вработени и играчи и заштитата на колективното здравје остануваат наш највисок приоритет, соопшти АСОМ.

Со оглед на влошената епидемиолошка состојба, Асоцијацијата апелира на почитување на мерките за лична заштита од страна на играчите и придржување кон протоколот по кој работат спортските обложувалници.

Наведува дека сите членки на АСОМ на влез имаат поставено дезинфекциски средства, вработените носат заштитна маска, на шалтер е присутен по еден играч со растојание од два метра со играчот кој следен чека за уплата, играчите задолжително носат заштитна опрема на лице, а во објектите во текот на работното време и по завршување се врши редовно чистење и дезинфекција на сите простории и инвентар.

– Спортските обложувалници беа меѓу првите деловни субјекти кои со рестриктивните мерки на Владата за заштита од ширење на КОВИД-19 беа целосно затворени од 14 март 2020 година. Членките на АСОМ, и покрај големите загуби во текот на двомесечното затворање, немаа отпуштања и ги задржаа сите свои вработени, наведува АСОМ