Владата ги надмина своите надлежности и постапи спротивно на насоките од извештаите на Европската комисија за напредокот на РСМ и на препораките на Советот на Европа, за гарантирање на незвисноста на регулаторните тела во областа на медиумите.
Ова е реакцијата на Агенцијата за аудио и аудиовизуелни услуги (АВМУ) по одлуката на Владата од последната седница да даде негативно мислење за Регулаторната стратегија за развој на аудио и аудивизуелната дејност за периодот од 2019 до 2023 година и да побара нејзино ревидирање. Образложението на Владата е дека стратегијата не е усогласена со „другите стратешки документи за развој на оваа област“.
Во клучната препорака на Советот на Европа за независноста и функционирањето на регулаторните тела, јасно и недвосмислено се истакнува дека јавните власти не смеат да влијаат на независноста на медиумските регулатори. Основната цел на овие препораки е да се спречат токму ваквите упади на извршната власт во работењето на регулаторите, реагираат од АВМУ.
Од Агенцијата појаснуваат дека Регулаторната стратегија била доставена до Владата, до Собранието и до МИОА не за усвојување, туку за да ги информира за тековните состојби во медиумската сфера, како и за активностите што таа ќе ги преземе во следните пет години, во насока на подобрување на одредени аспекти во сферата на медиумите.
Оваа стратегија не е неусогласена со, како што наведува Владата, „другите стратешки документи за развој на оваа област“, имајќи предвид дека такви документи не постојат. Агенцијата, за да изработи издржана и квалитетна стратегија, во нејзиното изготвување ги вклучи пошироката експертска јавност, новинарските здруженија, граѓанските организации од сферата на медиумите, преку учество во бројните одржани состаноци и јавни расправи, посочуваат од АВМУ.
Comments are closed for this post.