Лидерот на ВМРО-ДПМНЕ Христијан Мицкоски очекува победа на партијата на претстојните претседателски избори.

Јас лично очекувам една голема победа на ВМРО-ДПМНЕ на следните претседателски избори, рече Мицкоски, во изјава за новинарите пред Соборниот храм во Скопје каде присуствуваше на божиќната литургија.

Тој информира дека партијата штотуку го објавила конкурсот за избор на кандидат за претседател.

ВМРО-ДПМНЕ е политичка партија која транспарентно се обраќа кон граѓаните и кон сите оние заинтерсирани кандидати кои сакаат да аплицираат на конкурсот, а се разбира ги исполнуваат условите кои што се со закон пропишани. Конкурсот трае до 31 јануари и тогаш јавноста ќе знае кои се имињата кои се пријавиле на тој конкурс. Од пријавените кандидати на конвенцијата ВМРО-ДПМНЕ ќе избере оној кој ќе понуди најдобра програма, рече Мицкоски.

Мицкоски рече дека претседател во РМ, се станува кога мнозинството граѓани во РМ ќе ја дадат довербата, на оној кандидат кој ќе освои најголем број од гласовите на сите етнички заедници во Македонија кои што ќе излезат да гласаат и тој ќе биде и претседател на РМ.

Посочи дека имаат редовна комуникација со претседателите на политичките партии од албанските етнички заедници и дека иако тие средби не се официјална, се одвиваат на различни нивоа, вклучувајќи и на претседателско ниво.

Останувам на принципот дека во ова држава граѓаните треба да ги делиме на оние кои се лојални и не се лојани, а не според етнички принцип и етнички клуч. Тоа беше грешка во минатото, се злоупотребуваа етничките заедници. Тоа не треба да биде пракса во иднина. Во РМ треба да победи претседателски кандидат кој што ќе го освои мнозинството гласови на граѓаните на РМ, рече лидерот на ВМРО-ДПМНЕ изразувајќи уште еднапш убеденост во победата на следните претседаталски избори.

Запрашан за Законот за корупција, Мицкоски истакна дека нивните забелешки се принципиелни и биле изложени на работната група во рамки на Собранието и изрази надеж дека СДСМ ќе се повлече од најавата за негово повторно ставање во собраниска процедура но со европско знаменце.

Овој закон е исклучително важен и треба да ја добие поддршката од сите политички партии. ВМРО-ДПМНЕ е на располагање. Имаме аргументи кои се во согласност со ГРЕКО и со меѓународното право и подготвени сме да ги аргументираме каде било, кога било и со кого било од нашиот политички противник…Основен принцип на овој закон е формирање нов чадор што би служел во подоцна фаза за притисок врз политичките неистомисленици, рече Мицкоски подвлчекувајќи дека во ваква форма нема да го поддржат законот.