Претседателот на ВМРО-ДПМНЕ, Христијан Мицкоски, госуваше во дебатната емисија на ТВ „Клан“ при што зборуваше за политичката ситуација во државата, нестабилното парламентарно мнозинство, криминалните афери на власта, како и за ненабавката на вакцини против Ковид-19 вирусот.

Мицкоски потенцираше дека народните избраници во парламентот, односно пратениците, треба да бидат слуги на граѓаните, бидејќи граѓаните од нив очекуваат решенија за нивните проблеми.

Она што изминатите денови се случуваше во Собранието на Република Македонија, вклучувајќи го и вчерашниот ден кога беа донесени во Собранието пратеници заболени со корона вирус, претставува кршење на законите и прикажување една елементарна негрижа кон здравјето и животите на сите присутни во пратеничките клупи – вели Мицкоски.

Тој потенцира дека пратениците од владејачкото мнозинство, наместо да работат за она што се изгласани и за она за што од народот добиле доверба, тие неколку дена приредуваат драмолетки кои најпрво не доликуваат на сериозни и возрасни луѓе, а потоа и на политичари од кои се очекуваат решенија на проблемите на граѓаните.

Најмал проблем е тоа што пратениците и спикерот си ги лечат фрустрациите на таков начин, реален проблем е што поради нивниот несериозен пристап, најголема штета трпат граѓаните кои со месеци очекуваат помош од државата.

 

Јас во неколку наврати изминатите месеци кажав дека парламентарното мнозинство не е стабилно и работата на Собранието не е ефективна во онаа мера во која би требало да биде. Доказ за тоа се и случувањата изминатите денови во Собранието, но и случувањата кои датираат од пред неколку месеци.

 

Јас ја разбирам владеачката партија дека е во страв и очај поради тоа што и тие самите си го гледаат крајот, но сега не е момент за драмолетки и несериозно однесување, бидејќи на народот му е потребна помош, а пратениците се должни тоа да го овозможат – истакна Мицкоски.

Лидерот на ВМРО-ДПМНЕ истакнува дека додека пратениците од владејачкото мнозинство пред тв екраните приредуваа циркус, истовремено огромен број семејства очекуваа да им се додели државна помош, која ќе ги спаси од крпењето крај со крај во месецот.

Економијата е клекната на колена, многу семејства останаа без работа, а оние кои што се уште се на работните места немаат извор на примања поради немањето средства и поради тоа што нивните газди немаа државна помош. Тоа е она на кое што пратениците треба да бидат фокусирани, а не на насоките на нивниот лидер и неговите хирови – порача Мицкоски.