Првиот чекор за да започнеме со ослободување на процесот, во основа е да ги убедиме нашите европски партнери дека не е Бугарија таа што треба да се разбере со Република С. Македонија, туку дека ЕУ треба да се разбере со Република С. Македонија. Тоа значи дека ЕУ треба барем делумно да го прифати бугарскиот став дека има проблеми со говорот на омраза, со проблемите на Бугарите во Република С. Македонија. И кога ЕУ ќе го прифати ова, проблемот ќе биде меѓу ЕУ и Република С. Македонија, а не меѓу Република С. Македонија и Бугарија. Се додека немаме поширок ангажман и прифаќање на нашиот став, нема начин Бугарија да го укине ветото, нагласи бугарскиот вицепремиер и министер за финансии Асен Василев.

Тој истакна дека пораката што Софија ја добива од европските партнери е да седне со властите во Скопје и да постигне договор за откочување на пристапниот процес на земјава во ЕУ.

Подметнувањето на пожарот во Бугарскиот културен центар во Битола претставува уште еден обид за разгорување на страстите, со цел да се спречи постигнување разумно решение од страна на министерствата за надворешни работи на С.Македонија и Бугарија, заедничката Историската комисија и сите оние кои се трудат да најдат такво решение, оцени бугарскиот вицепремиер Василев во изјава за софиската Нова ТВ.

– Пожарот не е насочен против Бугарија или Република С. Македонија , туку е насочен против обидите да се постигне договор и тоа доаѓа по многу долго време на разговори и ветувања, за да се дојде до точка на разбирање, смета Василев, кој заедно со бугарскиот премиер Кирил Петков е копретседавач на партијата Промената продолжува (ПП).

Според него, подметнувањето на пожарот е нешто што нема шанси да не предизвика емоции, па оттука и да не влијае на преговорите.

– Се надевам дека тоа нема да има драматичен ефект, нагласи Василев.

Тој смета дека „прашањето со Република С. Македонија не е ситуација поврзана со партијата ПП, туку со целата бугарска држава и народ, а Бугарија долго време не го поставувала тоа прашање“.

– Подолго време молчевме за ова прашање со Република С. Македонија. За разлика од Грција која 20 години викаше дека имаат проблем, а ние велевме дека нема проблем и во последен момент кажавме дека сепак има проблем, рече Василев, додавајќи дека проблемот постои и дека не може „да се стави под тепих“.