Поголеми приноси, намалени трошоци, подобар квалитет,  очекуваат земјоделците кои денеска ги потпишаа првите договори за инвестиции во подземни системи за наводнување „капка по капка“. Тие како што изјавија денеска,  се задоволни од добиената поддршка и велат дека ќе аплицираат и за останати мерки.

Меѓу првите потписници беа и производители од Росоман и Куманово, производители на праска и грозје.

 

Ќе ве изненадиме со нови, квалитетни производи. Ова е стимул повеќе за сите нас. Ќе ги намалиме производните трошоци, ќе ги замениме моторните пумпи и веќе нема да има загадување со издувни гасови, изјави Цане Петрески од Охридско, производител на јаболко, круша и градинарски култури.

Министерството за земјоделство обезбеди поддршка од 20 милиони денари за вкупно 43 договори. Ќе се кофинансираат со 50 до 75 проценти реализираните инвестиции во опрема, нејзино инсталирање, изведување потребни градежни работи и изготвување елаборати. Максималната сума што може да ја добие секое земјоделско стопанство, апликант за поддршката, е 1,8 милиони денари.

Според министерот Љупчо Николовски, поддршката за вложување во подземни системи „капка по капка“ ќе значи чекор напред кон современо земјоделство, олеснување на производството и конкурентност на пазарот.

Со ова ќе ставиме крај на маките на земјоделците директно ќе влијаеме на подобрување на земјоделското работење и на подигнување на стандардите. Поголема ефикасност, но и поголем квалитет е најмалку што може да очекуваме од реализацијата на овие проекти, истакна директорот на Платежната агенција, Николче Бабовски кој ги врачуваше договорите.