Турскиот претседател, Реџеп Таип Ердоган, на 8 април ќе отпатува за Москва, што ќе биде негова трета посета на Русија од почетокот на годинава, соопшти денеска Кабинетот на шефот на турската држава.

Како што јави ДПА, во соопштението не се посочени детали за посетата на Ердоган на Москва.

Во исто време, портпаролот на Кремљ, Дмитриј Песков информира дека на 8 април ќе се одржи заседание на Руско-турскиот совет за соработка на високо ниво, на кое ќе присуствуваат претседателите на Русија и на Турција, Владимир Путин и Ердоган.

Путин и Ердоган се сретнаа во Москва во јануари годинава, кога разговараа за состојбата во Сирија. На темата Сирија, тие разговараа и на средба во Сочи во февруари, каде им се придружи и иранскиот претседател Хасан Рохани.

Русија и Иран се главни сојузници на претседателот на Сирија, Башар Асад, додека Турција подржува дел од сириските бунтовнички групи.