Со присуство на премиерите на Македонија и Србија, Зоран Заев и Ана Брнабиќ, денеска ќе биде отворен првиот „One stop shop“ на граничниот премин Табановце-Прешево.

Пуштањето на овој „„One stop shop“ се очекува да придонесе за помалку контроли и царинење и забрзување на протокот на патници, стока и превозни средства ќе овозможи заедничкото гранично управување што треба да стартува утре на преминот Табановце – Прешево. Со тој концепт се очекува со едно застанување на заедничка испостава двојно да се намали времето на чекање за граѓаните и превозниците.

Концептот на заеднички гранични контроли и гранични контроли со едно застанување (One-stop shop) значи поедноставени постапки, што се спроведуваат на еден заеднички граничен премин, при минимален број застанувања, по можност единствено застанување, преку кој контролата на патниците, стоката и нивните превозни средства се врши само еднаш на едно место. Со примена на концептот на заедничка контрола се постигнува поголема усогласеност и се олеснува преминувањето на патниците, стоките и превозните средства во патничкиот сообраќај, како и предметите што патниците ги носат со себе.

За патниците и транспортерите кои од Србија ќе се движат кон државава српската гранична служба ќе спроведе излезна контрола на наша територија на ГП Табановце, додека контролата за оние кои патуваат од кај нас кон Србија излезната контрола македонските гранични служби ќе ја спроведат на српска територија, на граничниот премин Прешево.

Според надлежните, во примената на овој концепт од исклучително значење е користењето на еден заеднички објект на граничниот премин каде што се вршат граничните формалности.  Покрај забрзан проток на патници, стока и превозни средства, заедничкото царинење, меѓу останатото, треба да овозможи повисок степен на хармонизација на граничните контроли, како и да се намали можноста за царински измами, поради директниот увид во комерцијалните документи што ја следат стоката.

Заедничкото царинење е и едно од барањата на транспортерите, кои сметаат дека со ова ќе се олесни процесот на транспортот и превозот на стоки.

Заедничка контрола, покрај на граничниот премин Табановце, се подготвува и на железничкиот премин Табановце и на Ќафасан кон Албанија. На ГП „Ќафасан“ веќе се одвиваат градежни работи за надградба на објектите.

Со пуштањето на новиот „One stop shop“, српската премиерка ќе ја почне посетата на Македонија во чии рамки ќе оствари средби со македонскиот државен врв.