На навредите и етикетите кон мене им се придружи и премиерот. И морам да кажам дека се согласувам со него дека сум надвор од неговиот концепт на живот, напиша на својот ФБ профил професорката Гордана Силјановска Давкова возвраќајки на денешната изјава на премиерот Зоран Заев.
Јас сум надвор од неговиот концепт на живот во која работа има само за децата на неговите министри и владини функционери.
Надвор сум од неговиот концепт за живот во кој тендери има само за неговите соработници, пријатели, роднини и партиски другари.
Не сакам да бидам дел од концептот во кој живеењето значи од Фондот за пензиско и инвалидско осигурување да исчезнат 19 милиони и никој да не одговара.
Да, јас сум надвор од моралните норми во кои во сообраќајка загинаа 15 луѓе, а никој не презема политичка одговорност за трагедијата, напиша проф Силјановска, која во саботата на Конвенцијата на ВМРО-ДПМНЕ во Струга беше избрана за надпартиски претседателски кандидат.
Премиерот Заев денеска изјави оти смета дека кандидатот на ВМРО-ДПМНЕ, Гордана Силјановска, не е прифатлива како консензуален претседател. Според него, Силјановска е надвор од секој концепт во кој што е огромно мнозинство на граѓаните.
Таа не даде во ниту еден сегмент поддршка на тоа што цел свет го поддржува како и огромно мнозинство граѓани. Македонија исчекори со квантен скок напред. Отидовме во исполнување на нашите децениски аспирации-истакна премиерот.
Comments are closed for this post.