Неколку стотици илјади луѓе, во очи на каталонскиот национален празник „Диаде“, протестираа во Барселона и други градови во шпанската област, повикувајќи на независност и на ослободување од затвор на лидерите на каталонското сепаратистичко движење.

– Да создадеме Каталонска Република, извикуваа демонстрантите, кои при тоа одстранија слика од шпанскиот крал Фелипе Шести. Организаторите проценуваат дека на протестите излегле 470.000 луѓе.

Собирот доаѓа малку пред годишнината од референдумот за отцепување на Каталонија од Шпанија, на кој мнозинството од Каталонците што го искористија своето право на глас се изјанија за независност.

Шпанската Влада го прогласи референдумот за противуставен и одговори со кривични прогони на водечките каталонски сепаратистички политичари, од кои дел се или во затвор или во егзил.