Неприфатливо е користење на насилство и поттикнување насилство во политички цели, вели во денешното соопштение до јавноста претседателот Стево Пендаровски.

Настанот кој се случи вчера во Скопје не смее да се повтори, бидејќи нема ништо позначајно од мирот и безбедноста на сите граѓани. Упатувам апел до сите организатори на протестите, кои овие денови се одвиваат во Македонија, да преземат одговорност и нивното демократско право да протестираат да продолжат да го практикуваат достоинствено и без насилство. Истовремено најостро го осудувам носењето и користењето на огнено оружје од цивили и граѓани на земјава, кои не се припадници на органите за безбедност. Вчера полицијата имаше навремена реакција, која спречи поголеми судири. Очекувам сите лица, кои вчера беа инволвирани во инцидентот, да бидат приведени и соодветно санкционирани во најкус можен рок, се вели во соопштението испратено од претседателскиот кабинет.