Малку надежи за брзо формирање влада донесоа парламентарните избори во Бугарија што ги сведува на теорија можностите за брза деблокада на евроинтеграцискиот процес на Македонија. Традиционалниот политички естаблишмент загуби, а добија т.н „протестни партии“ кои застанаа зад демонстрациите против долгогодишното владеење на Бојко Борисов. Неговиот ГЕРБ е формален победник, но со слаб капацитет да стигне до мнозинство во парламентот. И првите пораки од изненадувањето на изборите – шоуменот Слави Трифонов и неговото движење „Има таков народ“ се дека не би брзале во влада.

БСП би ја поддржала владата на второпласираната партија на парламантерните избори во Бугарија, од неделата, на шоуменот Слави Трифонов – „Има таков народ“, во која би влегле и „Стани! Излези!“ на поранешниот правобранител на земјата, Маја Манолова, и „Демократска Бугарија“ на поранешниот министер за правда, Христо Иванов, изјави за Нова ТВ пратеникот на БСП, Христо Проданов.

Како што јави дописникот на МИА од Софија, повикувајќи се на Проданов, доколку сите партии изјавија дека се „за“ смена на владата на премиерот Борисов, тогаш може да се зборува за поддршка на владата со мандат на партијата „Има таков народ“.

Проданов ја потврди намерата на неговата партија да не ја поддржува владата на ГЕРБ во каква било форма. Според него, доколку е потребно, може да се оди и на нови избори во Бугарија.

Сите партии, со исклучок на „Демократска Бугарија“ и „Има таков народ“, загубија на парламентарните избори во Бугарија.

Што се однесува до поддршката на БСП за претседателот Румен Радев за нов претседателски мандат на изборите на крајот на годината, проданов кажа дека е речиси 99 отсто убеден дека членовите на БСП ќе ја поддржат сегашната претседателска двојка, бидејќи како што им се допаѓа работата на лидерката на БСП, Корнелија Нинова, така им се допаѓа и работата на Румен Радев и Илијана Јотова.