Екипи на Северна и на Јужна Кореја почнаа да ги отстрануваат минските полиња на нивната силно обезбедувана меѓусебна граница, што е дел од процесот за намалување на тензиите меѓу двете земји.

Чистењето на мините се врши во областа Гангвон, каде е предвидено и откопување на телата на војници убиени во Корејската војна (1950 – 1953), со цел да се овозможи нивна идентификација и достојно погребување. Се очекува деминирањето во оваа зона да трае најмалку 20 дена.

Северна и Јужна Кореја ги концентрираат своите воени сили на границата и во минатите децении постојано разменуваа закани со војна. Но, по средбата на американскиот претседател Доналд Трамп со севернокорејскиот водач Ким Јонг – ун и средбите меѓу Ким и јужнокорејскиот претседател Мун Џае – ин, во тек е процес на затоплување на односите.