За разлика од балканските политичари, шведските немат никакви привилегии. На работа одат со метро или автобус, немаат имунитет и обезбедување, а канцелариите во кои работат се идентични како и на останатите вработени во државната администрација.

Бразилската новинарка Клаудија Волин, која од 2003 година живее во Шведска, опишува како изгледа животот на политичарите во оваа скандинавска држава.

Ова може да звучи чудно за луѓето кои живеат во други земји, но Шведска не им нуди никаков луксуз или привилегии на своите политичари. Без службени автомобили или приватни возачи, шведските министри и пратеници патуваат во преполни автобуси и возови, исто како и граѓаните чии интереси ги претставуваат, пишува Волин во својот текст, кој го пренесува Индекс.хр.

Таа додава дека политичарите во Шведска немаат право на пратенички имунитет, односно дека може да им се суди како и на секој друг жител. Бразилската новинарка објаснува и дека шведските функционери најчесто работат во канцеларии помали од осум квадратни метри.

Јас сум оној кој ги плаќа политичарите. Не гледам причина зошто ние како граѓани би им овозможиле луксузен живот, вели Јоаким Холм, шведски државјанин од кого новинарката зела изјава.

Волин во својот текст нагласува дека политичарите кои ќе се осмелат да трошат јавни пари за такси, наместо за возење со воз, завршуваат на насловните страници на весниците. Дури и претседателот на парламентот добива картичка за користење на јавниот транспорт, пишува Волин.

Таа исто така објаснува дека само премиерот на Шведска има право трајно да користи автомобил и лично обезбедување.

Шведските министри и пратеници живеат во мали станови во главниот град, а никој не заработува многу. На пример еден парламентарец зема плата два пати поголема од еден наставник во основно учулиште.