Вооружен напаѓач убил четири мажи и ранил седум други лица во популарен бар во мексиканскиот град Акапулко. Ова е последниот во низата насилни инциденти во некогашното гламурозно одморалиште на брегот на Тихиот Океан.

Обвинителството на државата Гереро соопшти дека жртвите биле жители на Акапулко и оти е уапсен еден осомничен.

Форензичарите на местото на злосторството пронашле 21 чаура.

Локални медиуми јавија дека нападот се случил во локалот „Мистер бар“ кој се наоѓа во таканречената златна зона, на една од широките градски авении, спроти луксузни хотели на брегот.

Полицијата испрашала сведоци за да утврди дали се работи за напад или караница меѓу гости.

Локалните власти неколку дена претходно во Акапулко покренаа безбедносна операција на почетокот од туристичката сезона.

Во државата Гереро и Акапуко е регистриран пораст на насилството и бројот на убиства, што е причина за пад на бројот на туристи во градот што некогаш беше многу популарна дестинација меѓу холивудскиот џет-сет.