Драган Сиљаноски, агент на хрватскиот тренер Иван Леко од белгискиот клуб Бриж, е уапсен за перење пари и корупција во скандалот со наместените фудбалски натпревари.

Иван Леко, пред два дена, исто така, беше однесен на распит, но против него не беше издаден налог за апсење.

Информацијата за апсењето на Сиљаноски утринава беше потврдена од белгиското федерално обвинителство.

Сиљаноски (44) од Кичево е поранешен македонски фудбалер, кој во текот на кариерата играл за белгискиот клуб Антверп.

Почнал во матичниот клуб Напредок, каде што бил член до 1990 година, а потоа преминува во прилепска Победа. По кратко време оди во Работнички,  а најдобрите настапи за македонски клуб ги има во Слога Југомагнат, која беше трикратен шампион на Македонија. Имал и повици за да игра за македонската репрезентација кога селектор беше Ѓоре Јовановски.

По Слога тој заминува за Белгија и станува дел од екипата на Антверпен, а трансферот го прави со посредство на срспкиот менаџер, Ранко Стојиќ. По пет години го напушта белгискиот клуб и во 2007 година заминува во израелски Макаби, каде што ја завршува кариерата.

Потоа, Сиљаноски се враќа во Белгија и почнува да работи како фудбалски менаџер.

Силјаноски во текот на менаџерската кариера соработувал со многу македонски фудбалери, а речиси секој трансфер на наш играч во белгиски клуб, одел преку Драган, во јавноста познат како Вуко.

Освен Силјаноски, уапсени се и Моги Бајат и Дејан Вељковиќ. Вељковиќ по потекло е од Србија и според белгиските медиуми е поврзан со повеќе белгиски клубови од Првата лига, каде сместил голем број фудбалери и тренери.

Првиот дел од оваа огромна судска истрага за корупција во фудбалот е фокусирана токму на Вељковиќ, кој е осомничен за трансфери на играчи од кои задржувал значајни провизии за себе и за играчите кои ги застапувал. Фондовите транзитирале преку судски ентитети во Србија, Црна Гора и Кипар, објаснија обвинителите.

Од друг дел на истрагата излегува дека Вељковиќ во договор со четири членови на административниот одбор на клубот „Малин“ влијаел врз резултатите на два натпревари, што веројатно вклучува договор со судијата Барт Вертентен.

Покрај тоа, има индиции дека бил воспоставен контакт со двајца новинари за да се влијае врз медиумската покриеност на перформансите на судијата Вертентен.

Овој скандал ја тресе белгиската јавност веќе втор ден. Во средата беше обелоденото дека широка европска истрага утврдила корупција, перење пари и обид за местење натпревари во 1А лигата во Белгија. Истрагата вклучува повеќе европски земји вклучително и Македонија.