Се добива впечаток дека Западот не ги научи лекциите од „украинската трагедија“, па постојат упорни обиди Балканот да се претвори во уште едно воено упориште против Русија, изјави рускиот министер за надворешни работи Сергеј Лавров.

Во интервју за „Српски телеграф“, Лавров нагласува дека на земјите од балканскиот регион „упорно им се наметнува изборот или сте со Москва или со Вашингтон“..

Лавров вели дека врз Белград се врши сериозен притисок со цел да се намали „взаемно корисната соработка со Москва“, но дека „српските браќа на ова храбро се спротивставуваат“, што Русија исклучително го цени.

Москва високо ја цени независната повеќевекторска надворешна политика на Србија која одговара на клучните интереси на народот, нагласува Лавров.

Говорејќи за Косово, шефот на српската дипломатија вели дека Москва е подготвена да ги разгледа сите варијанти за решавање на косовскиот проблем, што би биле прифатливи за Белград.

Нашата позиција за Косово е позната. Таа се потпира на меѓународното право, пред се на Резолуцијата 1244 на Советот за безбедност на ОН. Ние постојано им даваме сеопфатна помош на српските пријатели во напорите за поддршка на легитимните интереси на Србија и билатерално и во меѓународните организации, истакнува Лавров.

Тој додава дека оваа политика Москва ја спроведува и во системот на ОН, Советот за безбедност и во многу други структури, вклучувајќи ги УНЕСКО, Интерпол и Светската царинска организација, потенцирајќи дека Русија „така ќе постапува и во иднина“.

Според него, ако Белград смета дека за Србија е прифатливо некое друго решение, Москва ќе биде подготвена конструктивно да го разгледа.

Коментирајќи го претстојниот состанок во Белград на претседателите на Русија и на Србија, Владимир Путин и  Александар Вучиќ, Лавров вели дека тогаш ќе бидат разгледани широк круг на  прашања.

Тој истакнува дека односите меѓу двете земји достигнале ново ниво на стратешко партнерство, што е видливо и во декларацијата за стратешко партнерство потпишано од рускиот и српскиот претседател во мај 2013 година во Сочи.

Лавров потенцира дека „вистинските братски народи – рускиот и српскиот – ги обединуваат заедничките културни и духовни корени, искрените чувства на пријателство и взаемните симпатии“.

Од особена важност е и блискоста на сестринските Руска и Српска православна црква, заклучува Лавров во интревјуто.