Прв пат по распаѓањето на Југославија, национализмот не ги одредува политичките случувања во регионот, а Договорот од Преспа е стратешки пораз на национализмот, рече портпаролот на грчката Влада и министер без ресор, Димитрис Ѕанакопулос, говорејќи на партиски настан организиран од СИРИЗА во една атинска населба.

Во обраќањето на тема „Планот и визијата за Грција во новата ера”, Ѕанакопулос се осврна и на решението меѓу Македонија и Грција, јави дописничката на МИА од Атина.

-Договорот од Преспа е стратешки пораз на национализмот во и вон границите бидејќи го отвора патот за соработка и развој меѓу земји кои имаат само да добијат од тоа, секако во особено тешки услови  за стабилноста, но и за безбедноста во поширокиот регион.  И сето ова е орден за нашата влада, орден за левицата. Затоа и ја грабнавме историската можност, без да сметаме на политичката цена, партиски интереси и без да направиме партиски пресметки, рече Ѕанакопулос и истакна дека „историјата ќе им оддаде почит на оние кои ја презедоа и ја завршија оваа многу тешка мисија”, споменувајќи ги владите од двете земји.