Само Зоран Заев и Радмила Шекеринска блескаат. Само тие не се виновни за корупцијата, криминалот, расипништвото и назадувањето на Македонија. Сите останати ги испокрадоа парите преку фондот за иновации, тендерите во здравство, си делат сами на себе кирии, си поделија ниви со марихуана и го соголуваа буџетот, велат од ВМРО-ДПМНЕ по вчерашните разрешувања во СДСМ.

Сите останати бараа „едно за вице”, само Заев и Шекеринска останаа да блескаат. Факт е дека Спасовски, Кирацовски, Ременски, Зекири, Манчевски и Шилегов беа катастрофа за СДСМ но уште поважно е дека тие се трагедија за Република Македонија. Затоа и Спасовски и останатите неспособни кадри на Зоран Заев мора да си поднесат оставки и од државните функции, а не како неспособни партиски кадри да продолжат да земаат пари од буџетот и да ја упропастуваат Република Македонија“, стои во реакцијата од опозицискат апартија.

Од таму ја поставуваат дилемата дали да се води едно министерство како МВР е поедноставно и неважно отколку да се биде потпретседател на СДСМ.

Доколку Заев не ги разреши Спасовски, Манчевски и Шилегов од функциите ќе биде повеќе од јасно дека така наречената метла е една голема фарса. Граѓаните не се должни да ја поднесуваат неспособноста на Спасовски кој нема ниту една акција за сузбивање на криминал, министер во чие време убиствата на улиците станаа секојдневие. Администрацијата не е должна да го трпи Манчевски и да премолчува на заканите и мобингот од негова страна дека ќе има кратење. Граѓаните на Скопје не се помалку важни од членовите на СДСМ па Шилегов да им биде градоначалник, кој година ипол потроши, а нема направено ниту еден проект“,велат од ВМРО-ДПМНЕ.

Според опозициската партија метлата е само фарса, се додека не си заминат како што наведуваат неспособните функционери и од државните функции на чело со Заев и Шекеринска, заклучокот ќе биде еден, а тоа е дека Заев се обидува преку театар за наводна метла да ги отргне граѓаните од реалноста и проблемите со кои секојдневно се соочуваат.

Потребна е метла која ќе го измете Заев, таа метла ја имаат граѓаните, а Заев ќе ја осети на избори“, стои во соопштението.