Градоначалникот на Скопје, Петре Шилегов, со видеопрезентација го најави почетокот на постапката за проектирање на капиталниот градежен зафат „Тунелите под Кале“. Целта на Град Скопје е со овој проект да го поврзе булеварот „Св. Климент Охридски“ со Пластичарска улица во Чаир. Проектот предвидува изградба на серија сообраќајници и кружен тек подигнати на столбови и пробивање тунел под скопското Кале.

Булеварот ќе биде издигнат на височина од шест до девет метри. Потоа, од зградата на Владата сообраќајот ќе се одвива по нов мост преку реката Вардар кој ќе биде долг 173 метри, а широк 20 метри и ќе има четири сообраќајни ленти. Мостот ќе продолжува како вијадукт долг 262 метри се до влезот во тунелот под Калето – соопшти Шилегов.

Градоначалникот нагласи дека Скопје првпат ќе добие тунел долг 250 метри, а широк 20 метри. Од тунелот сообраќајот ќе продолжи на кружен тек издигнат пет метри над Пластичарската улица.

Со овој проект Град Скопје го оформува вториот сообраќаен прстен во метрополата. Тоа треба да овозможи брз влез и излез на возилата од центарот и од северната страна на градот. Рутата ќе ја користат и автобусите на јавниот превоз.

Со подземни тунели под Кале и нов мост преку Вардар ги спојуваме двете страни на Скопје. Голем дел од планираните транзитни и градски магистрали во градот не се реализирани, што претставува сериозна тешкотија за нормално одвивање на сообраќајот. Продолжувањето на булеварот „Св. Климент Охридски“, со мост над реката Вардар, со тунел под Скопското кале и поврзување со булеварот „Никола Карев“ (Пластичарска улица) ќе ја зголеми мобилноста и протокот на возила и ќе има позитивни еколошки ефекти од намалената емисија на гасови и бучава – рече Шилегов.

Според одредени анализи презентирани на прес-конференцијата, секојдневно на мостот „Гоце Делчев“ транзитираат од 80 до 90 илјади возила. Со ова решение треба да се растовари сообраќајот во западниот дел од градското подрачје. Оската југ-запад ќе стане пофункционална, а се очекува голем дел од возилата кои транзитираат кон северните делови на градот да се движат по новоизградената сообраќајница.

Шилегов објасни дека постои можност за изведба на сообраќајницата во фази. Прва фаза – булевар „Св. Климент Охридски“ од пред крстосницата со булеварот „Илинден“ со изградба на мост и вијадукт до тунелот, втора фаза –  тунелот како посебен и трета фаза – булеварот „Св. Климент Охридски“ и крстосницата со булеварот „Никола Карев“.