Премиерот Зоран Заев, во придружба на министерот за транспорт и врски, Благој Бочварски, синоќа остварија средба со градоначалниците на Општина Охрид Константин Георгиески, на Општина Струга Рамиз Мерко и на Општина Дебрца, Зоран Ногачески. На средбата Заев истакна дека претстојниот извештај на УНЕСКО треба да се прифати како силен аларм кој повикува на заедничка акција на Владата и надлежните ресорни министерства како централна власт и на oпштините Охрид, Струга и Дебрца, за да се отстранат сите ризици кои го загрозуваат статусот на Oхридскиот Регион и Охридското Езеро како заштитено природно и културно подрачје од страна на УНЕСКО.

Сепак, општина Струга не се сложува со таквиот став. Првиот човек на општината, градоначалникот Мерко, во телефонски разговор за „Њуз1“ на прашањето дали во Струга се точно прецизирани градбите кои требат да се рушат и дали во Струга има многу градби кои треба да се рушат одговара дека тоа не е случај.

Зошто зборувате за рушење. Јас кажував за градење, не за рушење. Зборувавме, но дефинитивно немам став. Воопшто нема градби за рушење. Му кажав на премиерот и секогаш му велам дека во Струга нема градби за рушење. Охрид е влезен во Езеро, ние немаме, ние сме ограничени со регионалниот пат и во делот заштитена зона јавен имот во никој случај не смееме да градиме и не градиме – катекоричен е Мерко.

Во Општина Охрид, пак, е направен список со плажи (објекти) кои треба да се отстранат од брегот на езерото и тоа по редослед според тоа која плажа најдолго работела без договор со државата.

Деновиве од општината биле испратени известувања до лицата кои се третираат како сопственици на овие нелегални објекти во кое се информираат дека објектите треба да ги отстранат сами бидејќи во спротивно ќе им бидат урнати и ќе треба да платат за трошоците од уривањето и депонирањето на градежниот отпад.

Инаку, вчера Владата го разгледа и усвои Извештајот за состојбата со заштитата на природното и културното наследство на Охридскиот регион и напредокот во спроведувањето на препораките од Одлуката на Комитетот за светско наследство и ја задолжи Националната комисија за УНЕСКО на Република Македонија да го достави Извештајот за состојбата со заштитата на природното и културното наследство на Охридскиот регион и напредокот во спроведувањето на препораките од Одлуката на Комитетот за светско наследство до Центарот за светско наследство на УНЕСКО, најдоцна до 25 февруари 2021 година.