Поранешниот министер за здравство од редовите на ВМРО-ДПМНЕ Никола Тодоров денеска ќе гласа на престојниот референдумот.

Тој на денешната дебата на тема „Дебатираме за НАТО“ истакна дека одлучил да гласа откако партијата зазема позиција секој граѓанин сам да реши како ќе се однесува на денот на референдумот. Тодоров вели дека е за ЕУ и НАТО, но против договорот со Грција.

-Македонија мора да е дел од НАТО и јас сакам да ја видам Македонија како дел од Алијансата. Во рамки на тоа е и мојот став. Јас го разгледав ставот на партијата во однос на референдумот и имам право да одлучам како сакам. Не излегувам од ставот на партијата, напротив сметам дека мојот став е во рамки на партискиот став. На овој референдум јас ќе излезам и ќе гласам „за“ ЕУ и НАТО, а „против“ договорот. Некој ќе рече нема такво прашање, јас ќе речам има. Се ми е јасно, јасен ми е контекстот, јасно ми е дека мораме да бидеме членка на НАТО, потоа и на ЕУ. Јасен ми е и регионалниот контекст, рече Тодоров.

Јасни се сите предизвици, посочи тој, кои можат да надвиснат над Македонија и во каква ситуација може да биде.

Сите аспекти ми се многу јасни, но тоа е рационалното, а емотивното не ми дозволува да заокружам „за“.  По мене ВМРО-ДПМНЕ не смее да бојкотира затоа што не смее да биде мала гласна изолирана група на граѓани коишто се контаминирани. ВМРО-ДПМНЕ мора да биде силно мнозинство и затоа не смее да си дозволи да бојкотира. ВМРО-ДПМНЕ е уставотворна и државотворна партија и не може да дозволи да следи некои групи коишто заговараат бојкот. Друго ќе беше ако ВМРО-ДПМНЕ пред два-три месеци излезеше и речеше ние бојкотираме. Во ваква ситуација кога тој простор е заземен и воден од некои маргинални политички структури ВМРО-ДПМНЕ да биде партија која што ќе следи такви структури. ВМРО-ДПМНЕ мора да води, вели Тодоров

Тодоров вели дека би бил  неконзистентен доколку не излезе на референдумот бидејќи во минатото интензивно ја застапувал тезата дека било какво решение на спорот со Грција мора да помине на референдум.