Велосипедска тура со хуманитарен карактер „Cucle4Europe“ ќе почне утре на градскиот плоштад „Македонија“. Турата ќе се одржува од петти до 19 септември годинава со цел да се подигне јавната свест за ранливите групи на луѓе во Европа. 

Велосипедската тура ќе биде предводена од светскиот шампион и професионален спортист Џонас Колтинг, кој заедно со другите велосипедисти во текот на две недели ќе вози 2.500 километри.

Почетокот на рутата е во Скопје. Велосипедистите ќе поминат низ Портата „Македонија“ и ќе возат до границата со Косово, а потоа низ Косово, Црна Гора, Босна и Херцеговина и продолжува низ останатите европски држави до финалната дестинација градот Варберг во Шведска. Тоа што турата „Cycle4Europe“ ќе почне од Скопје е симболично затоа што фондацијата има соработка со три дома за деца без родители во нашата држава.

Организатор е шведско-норвешката фондација „Лоза“, а локален партнер во организацијата на велиспедската тура е Сојузот на специјални едукатори и рехабилитатори на Република Македонија.

Основачот на Фондацијата „Лоза“ Сабина Грубесон, која е еден од иницијаторите на „Cucle4Europe“ на денешната прес-конференција рече дека европските земји ја гледаат Република Македонија со позитивни очи и интерес бидејќи, како што рече, развојот е процес на соработка.

Преку „Лоза“ ние имаме волја да го поддржуваме локалниот општествен развој, рече Грубесон.

Колтинг соопшти дека целта е со утрешниот настан да се привлече внимание, да се информираат луѓето дека постои фондацијата „Лоза“ и да донираат средства за корисна работа. Колтинг, кој првпат е во нашата земја, изрази надеж дека ќе возат и видат убави предели.

Претседателот на Сојузот на специјални едукатори и рехабилитатори Горан Петрушев посочи дека се работи за тешка тура што можат да ја возат само професионалци. 

Тој информира дека попладнево ќе бидат донирани 50 велиспеди на деца и младинци, поранешни и сегашни корисници од Јавната установа „25 Мај“ и „Ранка Милановиќ“ и Домот за деца без родители „11 Октомври“.