Во рамки на Здружението на џез музичари и слободни уметници – ЗЏМ Скопје, почнува со работа издавачката куќа ЗЏМ Рекордс. Во тој контекст, најавен е и албумот „Dzijan Emin & Magical Orchestra – Live in Ohrid“, кој официјално ќе излезе на 21 април годинава.
Од Здружението информираат дека преку ЗЏМ Рекордс ќе продолжи да се афирмира и популаризира македонската џез музика, отварајќи нови патишта за нејзино презентирање и промовирање насекаде во светот, издавајќи дигитални и печатени музички изданија.

ЗЏМ продолжува да работи на подобрување на целокупната џез култура кај нас, збогатувајќи ја нашата културна сцена со нови квалитетни изданија, отсега па натаму под нивна етикета, соопштија од ЗЏМ. Албумот „Dzijan Emin & Magical Orchestra – Live in Ohrid“, е првиот на ЗЏМ Рекордс, кој е снимен во живо на концертот одржан во Антички театар, 2019 година.