20 години Таксират – „посилен од кога било“

Со настап на повеќе од 10 музички изведувачи на три сцени во арената „Борис Трајковски“, в сабота ќе се одржи финалната вечер на 20. издание на музичкиот фестивал „Таксират“. Посетителите, за кои се очекува да бидат неколку илјади, ги очекува музички маратон што ќе трае осум часа.

Почетокот на музичките случувања е закажан за 20 часот, а ќе траат до рано утрината. Како што известуваат организаторите, вратите од салата ќе бидат отворени еден час пред официјалниот почеток, односно во 19 часот.

На главната бина на „Таксират“, за првпат македонската публика ќе има прилика да ги погледне настапите на eден од најпосакуваните бендови на современата сцена, шведската инди-рок група „MANDO DIAO“ и легендарниот австралиски драм енд бејс феномен „PENDULUM“ кој доаѓа со својот фуриозен диџејски сет.

Покрај нив, светски концерт каков што не сме навикнати да очекуваме од македонски изведувачи, се најавува од македонските металкор легенди „SMUT“, а главната бина ќе ги пречека и славните изведувачи познати по своите незаборавни настапи „NOUVELLE VAGUE“, „ДУБИОЗА КОЛЕКТИВ“, „THERAPY“ и „Културно Уметнички Работници“.

На втората бина, во малата сала на Арената „Борис Трајковски“, премиерно кај нас ќе настапи апсолутниот светски битбокс шампион „RAHZEL“ придружуван од славниот скреч-тандем „The X-Ecutioners“, како и домашните водечки имиња кога се урбаните журки во прашање „SAF Sound System“ и „Trap Da Fuck Up!“.

„SILENT DISCO“, третата бина на „Таксират“ е подготвена за повеќечасовни сетови на три диџејски пулта во исто време резервирани за актуелна екипа која владее со скопските подиуми, „Скопски Грув“, „Oubli“ и „Шурбе“.