Тричлена делегација од Македонија од Дирекцијата за технолошко индустриски развојни зони, ДТИРЗ, веќе два дена на државна сметка ужива на саем кој е откажан, наводно трагајќи по странски инвестиции во Женева, пишува Република.

Дека на откажаниот саем се генералниот директор, раководителот на секторот на државна помош и лице ангажирано со договор на дело, инаку кум на братот на генералниот директор, се гледа и на социјалните мрежи, каде еден од нив гордо сподели дека се наоѓа во Женева, Швајцарија.

 

Но, во телефонскиот разговор директорот на ДТИРЗ, Александар Младеновски ги негираше овие информации и рече дека е во странство, но не во Швајцарија туку во Франција, на состанок со инвеститори.

Моето патување нема поврзаност со саемот во Швајцарија. Јас еве дури и решив да патувам и да ризикувам во време кога има коронавирус, рече Младеновски.

Додава дека патувањето трае од од 2 до 5 март и дека договорил инвестиција за Штип која ќе биде објавена наскоро.

Организаторите на Саемот за автомобили, по 79 години од одржувањето, годинава првпат го откажаа саемот поради коронавирусот.