Со 26,2 милиони евра од Светска банка ќе се подобрува инфраструктурата, модернизираат институциите и зајакне нивната соработка, со цел олеснување на трговијата и транспортот на Западен Балкан.

Министерството за финансии и Светска банка денеска потпишаа договор за финансирање на Проектот за олеснување на трговијата и транспортот на Западен Балкан. Ова е регионален проект, во кој покрај нашата земја, во првата фаза ќе се вклучат и Србија и Албанија, додека во втората фаза и Босна и Херцеговина, Црна Гора и Косово.

Министерот за финансии Драган Тевдовски на потпишувањето истакна дека целта на проектот е да се намалат трошоците за извоз и увоз и да се скрати времето за прекугранична трговија.

Проценката на Светска банка е дека со реализацијата на проектот, ќе се намалат трошоците за извоз и за увоз во регионот за околу 10 отсто. Сето ова ќе придонесе за унапредување на трговската размена, како и за повисок економски раст во регионот, рече Тевдовски.

Тој посочи дека проектот има четири компоненти: олеснување на движењето на стоките и услугите низ Западен Балкан, подобрување на транспортната ефикасност и предвидливост, подобрување на пристапот до пазарот за трговијата и инвестициите и поддршка за спроведување на проектот.

Директорот на Светска банка за Македонија, Марко Мантованели рече дека застоите на граничните премини на Западен Балкан се пет пати подолги во однос на многу ЕУ земји. Тој истакна дека ако трошоците за логистика се изедначат со ЕУ просекот, годишните заштеди би надминале и 1,1 милијарда долари или еден отсто од БДП во регионот.

Иако извезената стока од Западен Балкан влегува во ЕУ без царина, само десет до 20 отсто од фирмите во регионот се извозници. Согласно процедурите, вклучувајќи ги инспекциите и царините, времето поминато на патиштата и премините ја потиснува ефикасноста, ги зголемува трошоците и го спречува развојот на трговијата, вели Мантованели.

Министерот за транспорт и врски Горан Сугарески истакна дека преку втората компонента „Подобрување на ефикасноста и предвидливоста на транспортот“ се обезбедува поддршка за развој на Интелигентен транспортен систем на дел од Коридорот 10, преку набавка и инсталирање на систем за собирање на податоци за сообраќајот, контрола на висината на возилата кои пристапуваат кон автопатот, систем за собирање за временските сулови долж трасата на автопатот, како и систем за детектирање на транспорт на опасни материјали. Истакна дека ќе се обезбеди и техничка помош околу подготовката на домашните прописи за системот за интелигентен транспорт во согласност со соодветните директиви на Европската унија.

Проектот за олеснување на транспортот и трговијата на Западен Балкан е дел од четиригодишната рамка за соработка на земјава со Светска банка. Рокот на отплата е 12 години со вклучен грејс период од четири години, а каматната стапка е шестмесечен ЕУРИБОР зголемена за фиксен распон од 0,85. Ова значи дека сега каматата изнесува 0,6%.