Пратеничката на СДСМ, Мира Стојчевска, позната во јавноста по рекордните патни трошоци во износ од 12.000 евра, според информациите до кои дојдовме и ги добивме, ќе се радува и на вработувањето на својот син Виктор Стојчевски во ЕЛЕМ, кому денес му е прв работен ден, изјави на прес-конференција портпаролот на ВМРО-ДПМНЕ, Димче Арсовски.

Тој запраша дали е точно дека Виктор Стојчевски своето вработување во ЕЛЕМ го заслужил со навредливите коментари упатени кон граѓаните, кои ги нарекуваше „хибернирани кретени по улиците на Скопје“, или, пак, бил најдобар кандидат затоа што мајка му креваше рака за промена на името, покачувањето на акцизите или отворањето на измислени места за заменици директори во јавните претпријатија?

Зошто власта го сокри ова вработување? Јавноста треба да знае дали синот на Мира – или така позната како Мира- дизел е вработен на јавен конкурс? Уште колку кандидати биле пријавени за ова работно место? Во што бил синот на Мира – дизел подобар од останатите кандидати? Ова се прашања кои заслужуваат и мора да добијат одговор, изјави Арсовски.

Според него, илјадниците евра кои граѓаните годишно и ги даваат на Мира Стојчевска, сега ќе бидат дополнети со прилично солидна плата, што ќе ја зема нејзиниот син, а тоа за СДСМ и Зоран Заев е борба против непотизмот и корупцијата во Република Македонија.

Токму заради ваквиот однос на Зоран Заев и СДСМ, над 400.000 граѓани живеат во тешка беда и сиромаштија, помасовно од кога било, а Македонија тоне на листите на Транспаренси Интернешнл. Уште за колку вработувања на синови, ќерки, мајки и сестри ќе разбере јавноста во наредниот период. Само да потсетиме, во сите овие случаи за непотизам се работи за огромни плати и хонорари, кои се далеку повисоки од просечната плата која што ја земаат граѓаните, рече Арсовски.