Во пресрет на денешниот почеток на вакцинацијата со кинеската вакцина, унгарските власти ги повикаа граѓаните да веруваат во вакцините што се одобрени во земјата.

Државниот секретар на Унгарија, Иштван Ѓорѓи, рече дека на лекарите од општа пракса низ целата земја, кои ќе имаат на располагање 55 дози вакцина на „Синофарм“, им е наредено да им ги дадат на најстарите пациенти, пренесува АП.

Ѓорѓи рече дека 275.000 граѓани ќе примат кинеска вакцина оваа недела, пренесува АП.

Сите вакцини што се достапни во Унгарија се безбедни и можат да обезбедат заштита од вирусна зараза, рече Ѓорѓи.

Унгарија ќе биде првата земја во Европската Унија која ќе им даде кинеска вакцина на своите граѓани, иако, како што тврди АП, анкетите на јавното мислење покажуваат дека довербата на Унгарците во таа вакцина е на ниско ниво.