Медиумите балансирано известувале за предвремените локални избори во општина Штип, со исклучок на ТВ Ирис против која е покрената прекршочна постапка зашто доминантно најзастапен, со повеќе од половина од вкупното време за известување за изборите, бил кандидатот за градоначалник на СДСМ.

Како што соопшти Агенцијата за аудио и аудиовизуелни медиумски услуги (АВМУ), во периодот на кампањата во Штип, многу претставници на Владата имале посети на Источниот регион и нивната активност се пресликала и во известувањето на медиумите од регионот во вестите и/или во посебните информативни емисии. Притоа, некои од нив отворено искажале поддршка за кандидатот за градоначалник на Штип од СДСМ. Посебните информативни емисии биле повеќе застапени на регионалните телевизии, што, според АВМУ, е за очекување, имајќи предвид дека изборите се реализирале само во две општини.

Во однос на Пласница, утврден бил недостаток на информации за кандидатите за градоначалник, но поради нивна одлука, а не на медиумите. Мониторингот покажал дека кандидатите за градоначалник на Пласница не го искористиле ниту правото за бесплатно политичко претставување на Јавниот сервис.

-Од 13 радиодифузери регистрирани во ДИК, вкупно 8 емитуваа ППР, од кои 7 ТВ и 1 радио. За време на изборната кампања не беше констатирано прекршување на правилата за емитување платено политичко рекламирање кај ниту еден медиум. Најмногу време беше закупено на двете регионални телевизии ТВ Стар и ТВ М-Нет ХД, на кои беа емитувани рекламни спотови од кандидатите за градоначалник на Општина Штип. Податоците во Извештајот се проверени и низ постапката на потврдување на извештаите за реализирани услуги доставени од радиодифузерите, наведува АВМУ.

Од мониторингот на радиодифузерите за предвремените избори за градоначалници на општините Штип и Пласница, АВМУ изготви два извештаја – едниот за мониторингот над изборното медиумско претставување, вториот за емитуваното платено политичко рекламирање за време на кампањата (21 ноември – 10 декември 2020 година). Мониторингот над изборното медиумско претставување опфати 20 програмски сервиси, од кои 11 национални телевизии, Јавниот сервис (МРТ 1 и Собранискиот канал), 3 регионални (М Нет–ХД, Ирис и Стар), 2 локални телевизии (Ускана Медиа и Гурра), и 2 радија (Канал 77 и РФМ).

Двата извештаи од мониторингот на радиодифузерите за Предвремените локални избори во општините Штип и Пласница се достапни на веб страницата www.avmu.mk, во посебниот банер Избори 2020.