Премиерот Зоран Заев денеска од Ресен  порала дека разговорите со Бугарија продолжуваат, но потенцираше дека за македонскиот идентитет и македонскиот јазик ниту се преговора, ниту се разговара.

Тој истакна дека иако горчината од блокадата дадена на 9 декември е присутна кај сите нас и разочарувањето е големо, сепак друг пат нема и тоа е патот по кој треба да продолжиме и продолживме веднаш со разговори. Заев потсети дека на 10 декември при посетата на специјалниот претставник на Владата Владо Бучковски на Бугарија, заедно со државниот секретар Зоран Попов, на властите во Софија им се предадени нови идеи, кои треба да ги разгледаат и се чека повратен одговор од нив.

–  Драго ми е што почесто потврдуваат и од бугарската страна дека тие ја прифаќаат реалноста за постоењето на македонската народ и на македонскиот јазик, заради тоа што тоа е минимум европско, минимум цивилизациско. И верувам дека така ќе продлжиме. Наша задача е да одиме и да чекориме напред. Верувам дека најбрзо можно ќе се создадат услови за тоа. Ние не се откажуваме, ќе продолиме да работиме. Доаѓа период на празници и за време на празниците веројатно ќе се намалат активностите, но по празниците повторно ќе работиме, изјави премиерот Заев.

Коментирајќи ги вчерашните реакциите од Словачка и од Чешка, Заев нагласи дека му е драго што се уште има „европско во ЕУ“.

– Ова го кажувам малку со горчина, оти ако некој заслужил да добие поддршка за следниот чекор на патот кон ЕУ, тоа е Република Македонија, македонскиот народ и сите наши граѓани кои живеат во нашата земја. ЕУ не смее да ги изгуби европските вредности и принципи. Во тој дух, се надевам дека Европа ќе продолжи да го испраќа европскиот сигнал кон нас земјите кандидати за членство во ЕУ, затоа што немаме друга алтернатива, односно како што има кажано во минатото – нема да го изгасне светлото што не води во мракот, за да не бидеме изгубени во мракот, затоа што таа водилка е нашата мотивација за реформите и за да бидеме подобри граѓани, да ја европеизираме државата, да го средиме правосудниот систем, да имаме сила и енергија да градиме објекти за нашите деца, да го осовремениме здравството и уште повеќе да ја подобриме инфраструктурата, порача Заев.

Тој изјави дека секојдневно се работи на отстранување на омразата, нагласувајќи дека сака да испрати порака до сите дека Бугарите се наши сосед, наши пријатели.

– Јас често сум ги нарекувал Бугарите браќа, заради тоа што во нашата земја сме доминантно православен христијански народ, а во Бугарија исто така. Си ги имаме убавините на нашите различности, и етнички и религиски и тоа е сериозна нишка што навистина не прави големи пријатели и отвора сериозна можност за соработка. Историјата треба да ја оставиме на историчарите, затоа што постојат реално ноторни факти што треба да ги впишат во тие записници и таму кај што е мултиперспективноста на историјата да ја остават, рече премиерот.

Заев порача дека тој и премиерот на Бугарија, Бојко Борисов треба да имаат предвид што прават со историјата што ја пишуваат сега.

– Што им оставаме на децата и на идните генерации, кои сега чекаат од нас. Дали ќе им оставиме аманет на пријателство, на братство, на заедништво, на европски вредности, на меѓусебно помагање или ќе ги поделиме и разделиме повторно, како во времето на железната завеса, истакна Заев