Британските пратеници, вклучително и конзервативците кои беа исклучени од владејачката партија, се подготвуваат да ја бараат правдата на суд. Тие ќе го сторат тоа доколку премиерот Борис Џонсон одбие да побара од Брисел да го продолжи рокот на Брегзит за три месеци, јавува Би-Би-Си.

Џонсон е обврзан со закон да спречи Брегзит без договор, закон – кој во текот на неделата беше усвоен во двата дома на британскиот парламент.

Пратениците рекоа дека формирале правен тим и се подготвени да одат на суд за да го принудат Џонсон да го почитува законот.

Британскиот премиер пред неколку дена рече дека повеќе би сакал да биде „мртов во ендек“ отколку да го одложи Брегзит. Тој верува дека единствено решение за решавање на кризата во Брегзит е одржување на општи избори на 15 октомври.

Опозицијата не ја поддржа оваа идеја, а за да бидат распишани избори, потребна е поддршка од две третини од британските пратеници.