Американскиот претседател Доналд Трамп, потврди дека американските воени сили го убиле Џамал ал Бадави, еден од главните организатори на бомбашкиот напад во 2000 година врз воениот брод „Кол“ кога загинаа 17 американски војници.

Нашата војска донесе правда за хероите и ранетите во кукавичкиот напад на разурнувачот ‘Кол’. Убиен е лидерот на тој напад, Џамал ал Бадави. Никогаш нема да престанеме со борбата против радикалниот исламски тероризам – соопшти Трамп на твитер.


Информацијата за ликвидацијата на ал Бадави ја соопштија од американската војска која пред два дена соопшти дека оперативецот на Ал Каеда бил убиен во напад во Јемен.

Во октомври 2000 година гумен чамец полн со експлозив експлодира до разурнувачот „Кол“ што беше усидрен во пристаништето Адена заради полнење гориво. Во тој напад загинаа 17 американски војници и два напаѓачи. Одговорноста за нападот ја презема Ал Каеда.

Главниот осомничен за нападот, Абд ал Рахим ал Нашири, се наоѓа во американскиот воен затвор Гвантанамо на Куба.