Враќањето на поранешниот наркобос Фабио Очоа во Колумбија по неговата депортација од САД држави, повторно ги отвори старите рани меѓу многуте жртви на картелот Меделин, при што многумина денеска изразија вознемиреност од одлуката на колумбиските власти да го пуштат Очоа на слобода.

Некои од жртвите на картелот рекоа дека се надеваат дека поранешниот наркобос барем ќе соработува со групите за човекови права за да се истражи еден од најнасилните периоди во историјата на Колумбија, но побараа колумбиските обвинители да го доведат Очоа на сослушување.

Во доцните 1980-ти и раните 1990-ти, картелот Меделин уби полицајци, политичари, судии и новинари додека водеше војна против колумбиската држава, која потоа ги засили своите напори да ја запре трговијата со дрога, да апси шверцери на дрога и да ги заплени нивните средства. Некои историчари наведуваат дека имало дури 10.000 жртви на картелот.

Очоа тогаш беше еден од главните водачи на картелот и живееше неколку години во Мајами каде што водеше дистрибутивен центар за кокаин на картелот. Тој негираше вмешаност во убиствата на картелот, но многу жртви на картелот и нивните роднини се многу скептични за тоа тврдење.

Градоначалникот на Богота, Карлос Фернандо Галан, ималл 12 години кога неговиот татко, претседателскиот кандидат Луис Карлос Галан, беше убиен од убијци на картелот во 1989 година. Галан во понеделникот во порака на X напиша дека е неприфатливо Очоа да не се соочи со кривично гонење во Колумбија.

Очоа вчера беше депортиран во Колумбија, откако отслужи повеќе од 20 години во американски затвор поради пресуда за трговија со дрога, која не е поврзана со ниту едно убиство во Колумбија.

Во интервју со новинарите во Богота, Очоа тврдеше дека американските обвинители го наместиле. Тој додаде дека платил за своите злосторства за трговија со дрога во Колумбија на почетокот на 1990-тите, кога поминал неколку години во колумбиски затвор.

Очоа беше ослободен во 1996 година, но повторно беше уапсен во 1999 година и во 2001 година екстрадиран во САД, по барање на обвинителите во Мајами