Одлуката за укинување на поместувањето на часовникот од зимско на летно сметање, веројатно нема да биде донесена пред 2021 година, изјави австрискиот министер за сообраќај Норберт Хофер.
Тој изјавил дека датумот за почеток на спроведување на одлуката, две години подоцна од датумот кој го предложи Европската комисија, ќе им даде време на членките на ЕУ да се подготват.
Хофер пред почетокот на состанокот на министрите за сообраќај на ЕУ, изјавил дека поедини земји го предупредиле, доколку инсистира веднаш да се изврши промената, нема да бидат во можност во поедини сектори, како што се транспортот, да се спроведат неопходните мерки за прилагодување, јавува агенцијата „ДПА“.
„Доколку инсистираме промената да се изврши, тоа ќе го загрози предлогот на Комисијата и нема да бидеме во можност воопшто да ја сопреме праксата на поместување на часовникот“ – предупредил Хофер.
Европската комисија предложи членките на ЕУ да го укинат преминувањето од зимско на летно сметање на времето, откако таквиот предлог во анкетата спроведена на интернет во земјите на Унијата ја поддржаа 84 отсто од испитаниците.
Меѓутоа, членките на ЕУ и Европскиот парламент мораат да ја одобрат конечната реформа, а потоа земјите ќе одлучат дали ќе останат на летно сметање на времето или зимско.
Comments are closed for this post.