Израелската полиција соопшти дека ги истражува обвинувањата што го потресуваат правосудниот систем на земјата, а кои се однесуваат на сомнителни обиди да бидат назначени двајца судии.

Еден адвокат е уапсен поради сомнеж оти ги промовирал судиите во замена за сексуални услуги, во скандалот што дојде до министерството за правда, Врховниот суд и врховниот обвинитела на Израел. Адвокатот, кој е на висока функција во израелскиот правосуден систем, се обидувал да влијае за назначувањето на една жена и на уште едно лице за судии, соопштија од полицијата.

Полицајци влегле во канцелариите на израелската адвокатска комора и во домот на осомничениот, а испитувани се неколкумина за коишто се верува дека се вмешани во случајот. Истрагата почнала пред две недели откако се појавиле нови информации.


Врховниот израелски обвинител, Авихај Манделбилт, се изземал од водење на случајот поради тоа што е добар пријател со главниот осомничен.

Според очекувањата, на испитување ќе бидат повикани и главниот судија на Израел и министерката за правда, како и други членови на комитетот за назначување судии.

Портпаролот на полицијата, Мики Розенфелд, изјави дека проверува дали има повреда на интегритетот во врска со назначувањето на судиите. Тој соопштил и дека полицијата конфискувала документи во рамки на истрагата.