Европската комисија денеска соопшти дека го следи движењето на луѓе низ балканската бегалска рута, при што изминативе недели е забележано зголемување на бројот на мигранти и бегалци, но оценува дека сепак „вкупната состојба е стабилна”.

„Нормално е да постои движење низ балканската рута. Позицијата на Европската комисија од секогаш беше дека балканската рута не е затворена, изјави портпаролката на Еврокомисијата“, Мина Андреева.

Таа истакна дека Европската комисија заедно со Европската погранична и крајбрежна агенција (Фронтекс) го следи развојот на вкупната состојба во балканскиот регион и ја обезбедува потребната помош.

„Вкупната состојба е стабилна уште од постигнувањето на договорот меѓу ЕУ и Турција“, додаде Андреева.

Според неа, Еврокомисијата е во постојана комуникација со сите земји членки и со државите од Западен Балкан со цел да се реагира при евентуален мигрантски притисок во согласност со правилата.

„Во регионот моментно има 125 припадници на Европската погранична и крајбрежна агенција. Доколку биде потребно, подготвени сме да ја зајакнеме поддршката“, истакна Андреева.

Таа најави дека наскоро ќе бидат финализирани и договори меѓу ЕУ и земјите од западен Балкан, со кои ќе и се овозможи на Фронтекс учество во контролата и по потреба и директно управување со загрозените граници.