Претседателот на Собранието, Талат Џафери ја закажа за четврток во 11:00 часот седницата на која треба да се гласа доверба на Владата.

Информираме дека во Собранието е доставено Барање за гласање за доверба на Владата и истата е архивирана од надлежните служби. Претседателот на Собранието, Талат Џафери, согласно член 215 став 2 од Деловникот на Собранието, ќе ја свика седницата за поставеното барање за гласање доверба на Влада, а седницата ќе се одржи на третиот ден од денот на поставување на прашањето за доверба на Владата, односно во четврток, на 11 ноември 2021, во 11.00 часот. Според член 215 став 3 од Деловникот на Собранието, рокот за свикување седница почнува да тече наредниот ден од денот на поставувањето на прашањето за доверба на Владата, наведува Кабинетот на Претседателот на Собранието.

Кабинетот додава и дека за сите чекори и процедури, како и досега, претставниците на медиумите ќе бидат информирани преку надлежните служби во Собранието.

Пратениците од ВМРО – ДПМНЕ, АА и Алтератива, Беса и Левица денеска поднесоа Иницијатива за гласање недоверба на Владата. Иницијатива, како што соопшти Александар Николовски од ВМРО-ДПМНЕ, ја потпишале 61 пратеник.

Претседателот на ВМРО-ДПМНЕ, Христијан Мицкоски претходно кажа дека ќе го причекаат премиерот Зоран Заев да ја депонира најавената оставка, но откако тоа не се случи, иницијативата за гласање доверба на Владата попладнево е поднесена во Собранието