ВМРО-ДПМНЕ денеска објави уште 19 нови кандидати за градоначалници за локалните избори на 17 октомври, а меѓу нив беше потврден Тони Михајловски за Куманово.

Владимир Мисајловски, потпретседателот на ВМРО-ДПМНЕ, претставувајќи ги новите кандидати, за Михајловски рече дека е успешен и наградуван театарски, филмски и телевизиски актер и комичар.

Роден во Куманово, а признат македонски театарски, филмски и телевизиски глумец, водител на радио и телевизија и стоечки комичар.

Тој е сопруг и татко на два сина.

Добитник на бројни признанија од светот на уметноста, како наградата за најдобар глумец на петтиот меѓународен театарски фестивал „Јоаким ИнтерФест“ во Србија. Во 2012 година добил Повелба за странски актери на 47-от фестивал „Филмски средби“ во Ниш. Во македонската филмографија и драмски уметности може да се пофали со стотици драмски изведби на познати дела, како и домашни и странски филмови и телевизиски серии во кои има земено улога.

По долгогодишно членство во општинскиот комитет на ВМРО-ДПМНЕ во Куманово, во 2018-та година Михајловски стана член на Извршниот комитет на ВМРО-ДПМНЕ.