Кандидатката за претседател од опозијата, Гордана Силјановска – Давкова, ја почна кампањата за претседателските избори. Во продолжение соопштението од изборниот штаб на професорката Силјановска.

„Ја почнувам кампањата денес од мојот роден град Охрид. Би сакала да информирам дека кампањата има две лица едното е граѓанското, другото е на најголемата опозициска партија и предводник на коалицијата партии кои застанаа зад мојата кандидатура ВМРО-ДПМНЕ. Во граѓанскиот штаб, шеф е Горан Момировски. Во штабот на ВМРО-ДПМНЕ, шеф е Генералниот секретар Јанушев.

Граѓанскиот штаб се наоѓа во центарот на Скопје карши Багат, а ќе го отвориме во среда. Сите заинтересирани граѓани кои сакаат да се вклучат во кампањата ги замолувам да се упатат таму. Слоганот на кампањата е Правда за Македонија! Татковината повикува! Користиме хаш таг #ПравдазаМакедонија #Татковинатаповикува на социјалните мрежи.

Ве известувам дека додека ве убедувам да гласате за мене овие 20 дена низ цела Македонија мојата кампања ќе прави добро. Секој град кој ќе го посетам ќе добие, мала, бесплатна, јавна библиотека. Исто така граѓанските активности ќе бидат насочени кон правење добро за себе, за околината и за заедницата. За големите настани следете ја веб страната: http://gordanazapretsedatel.mk , а стрим во живо ќе има и ФБ страницата. За граѓанските настани следете ја страницава каде ќе бидат најавени.

Придружете ми се! Татковината повикува! Да се избориме за правда за Македонија!“