Во Кривичниот суд денеска има нови рочишта за предметот на Специјалното јавно обвинителство „Тврдина -Таргет“ за незаконското следење на комуникациите, во кое еден од обвинетите е и поранешниот директор на УБК, Сашо Мијалков. Мијалков, кому вчера му беше одреден 30-дневен притвор не се појави во Кривичен.

Осен Мијалков, во предметот „Таргет – Тврдина“ обвинети се и поранешниот началник на Петтата управа во МВР Горан Грујевски и вработениот во УБК Никола Бошкоски, кои се во притвор во Грција, шефот на кабинетот на Мијалков, Тони Јакимовски, Владимир Варелов од УБК, уште пет други лица од Управата, како и поранешната министерка за внатрешни работи Гордана Јанкулоска.

Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби. Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви. Прислушувани биле над 20 илјади граѓани.

Сашо Мијалков и Горан Грујовски, заедно со Гордана Јанкулоска и Никола Бошкоски се товарат и за уништување на системот за прислушкување на МВР и интермедијациските уреди на операторите во вредност од 1.418.879 евра, а Валентина Симоновска за фалсификување службен документ.

На претходното рочиште исказ даваше сведокот Ѓорѓи Лазаревски, кој заедно со Звонко Костовски ги извадија бомбите од УБК и благодарение на нив се откри аферата со прислушувањето.

Истрагата за предметот „Тврдина“ беше отворена на 29 март 2016 година, а за предметот „Таргет“ на 17 ноември 2016 година, а поради нивната поврзаност се споени во еден предмет. Обвинението е подигнато на 30 јуни 2017 година.