Премиерот во оставка Зоран Заев денеска повторно не дојде на закажаното судско рочиште против потпретседателот на ВМРО-ДПМНЕ, Александар Николоски. Заев го тужи Николоски за клевета во случајот „Рекет“.

На денешното судење во Основниот суд Скопје 2 се читаа завршните зборови за неговата тужба за клевета. Присутен во судницата беше само неговиот бранител Лазар Сандев.

Заев низ целиот процес се појави на само една судска седница, кога беше повикан како сведок.

Доказната постапка започна со нова судијка. Таа читаше наслови од медиуми во кои се посочува поврзаноста на Зоран Заев и неговиот брат Вице со случајот Рекет.

„Каде завршија парите од Луј Витон чантата“, праша Николоски во изјава за Алфа на 28.8 2019 година.

Во друг се посочува на изјавата на Бојан Јовановски – Боки 13 дадена на изрекувањето на пресудата: „Парите барајте ги кај Зоран и Вице Заев“.

Беше посочен и текст во медиумите во кој се пишува за средба на Заев со претставници на „Меѓународниот сојуз“ на Боки.

Николоски реагираше што не е наведен изворот на информациите во медиумите во кои се пишувало на оваа тема.

Беше прочитана и изјавата на куќната помошничка на Јовановски која тврдеше дека во неговиот дом видела доста високи функционери како министерката Радмила Шекеринска, тогашната специјална обвинителка Катица Јанева, бизнисменот Орце Камчев, министерот Венко Филипче, градоначалникот на Карпош Стефан Богоев, пратеникот Александар Кирацовски…

На тоа бранителот на Заев, Лазар Сандев имаше одговор.

Слободата на изразување не е дадена како аполутно човеково право туку како релативно кое може да биде предмет на законско ограничување. И политичарите имаат право да го заштитат својот углед иако е точно дека тие треба да имаат повисок праг на толеранција кога се работи за политичка дебата, посочи адвокатот.

Тој твдеше дека не постои доказ за поврзаност на Заев со овој случај. Напротив, твдеше Сандев, тој го пријавил случајот во Јавното обвинителство.

За изјавата на Боки дека парите треба да се бараат кај Зоран и Вице Заев рече дека е дадена во револт, бидејќи токму премиерот го пријавил случајот.