Претседателот на ВМРО-ДПМНЕ, Христијан Мицкоски, испрати честитка до граѓаните на Република Македонија по повод 11 Октомври – Денот на народното востание.

Во својата честитка, Мицкоски истакнува дека на 11 Октомври Македонците се кренаа  против фашистичкиот окупатор и го продолжија стремежот за слободен живот и сопствена држава. На 11 Октомври македонскиот народ застана на вистинската страна на историјата, се спротивстави на теророт и застана на страната на правдата, човечноста и слободата.

Со народноослободителната борба македонскиот народ го потврди континуитетот на борбата за државност и самостојност и ги реализираше целите и идеалите на Илинденците, со што ги постави темелите на македонската држава. Со тоа се оствари и вековниот сон за кој животот го посветија и дадоа многу македонски херои.

 

Патот по кој одеа нашите дедовци и татковци, и дадоа жртва за остварување на идеалот за државност и слобода, нѐ води и денес во остварување на подобра држава Македонија и подобра иднина за нас и нашите идни генерации – пишува Мицкоски.

Тој истакнува дека денес македонскиот народ повторно е обесправен, а се тргува и со темелот на македонската држава и со борбата на оние кои ја донесоа слободата и дадоа жртва борејќи се против неправдата.

Денес гледаме откажување и продажба на македонските национални и државни вредности, додека врз народот се врши невидена тортура и реваншизам. Неправдите, сиромаштијата и криминалот се секојдневие во Македонија. Токму затоа денес повторно е неопходно да застанеме против неправдите и да се избориме против злото за да ја вратиме Македонија на вистинскиот пат, градејќи светла и сигурна европска иднина.

 

Сите граѓани во Македонија го живееме истото секојдневие и затоа на 11 Октомври да се потсетиме на жртвата која ја дадоа македонските херои и да го продолжиме нивниот идеал, да се избориме за правдата и за доброто на државата и идните генерации.

 

Патот до слободата е вечен, а тој пат го оди и нашата генерација – вели Мицкоски во честитката за 11 Октомври.