Еврокомесарот за проширување, Јоханес Хан, во интервју за германската агенција ДПА предупреди дека одложувањето на отворањето пристапни преговори на ЕУ со земјите од Западен Балкан, кои оствариле напредок во исполнување на поставените критериуми, може да го дестабилизира целиот тој регион.

Хан го даде интервјуто пред состанокот што ќе се одржи в понеделник во Берлин во организација на германската канцеларка Ангела Меркел и францускиот претседател Емануел Макрон со претставници на земјите од Западен Балкан.

Одложувањето или непризнавањето на објективниот напредок на земјите кандидати би имало драматични последици за државите за кои станува збор и за целиот регион воопшто. Тоа речиси ќе предизвика негативен домино ефект – истакна Хан.

Еврокомесарот очекува кон крајот на следниот месец Европската комисија да даде позитивна препорака за Македонија и за Албанија за отворање преговори за членство врз основа на критериумите кои едногласно ги усвоиле земјите членки.

Особено ризично би било доколку на Северна Македонија и се одбие или одложи отворањето на преговорите за членство – нагласи Хан, додавајќи дека ако таа земја сега биде разочарана по триесет годишниот спор околу името и покрај спроведените реформи, тогаш постои опасност за внатрешна дестабилизација со соодветни последици за целиот регион.

Еврокомесарот, меѓу другото, истакна и дека главна цел на состанокот во Берлин треба да биде изнаоѓање на решение за блокадата на дијалогот меѓу Србија и Косово. Тој ја поздрави иницијативата на Париз и Берлин и нивниот интерес за регионот, но предупреди дека решението за тоа прашање не може да биде наметнато однадвор.

Јасно е дека одржливо решение мора да дојде од двете земји за кои станува збор, кои на крајот мора да постигнам можен договор и да им го претстават на своите граѓани. Однадвор наметнато решение не може да дејствува – нагласува Хан во интервјуто за ДПА.