Вработените во Град Скопје доцна летово ќе се преселат во новата зграда под Кале. Како што кажа градоначалникот Петре Шилегов, во тек се постапките за набавка на ИП телефонија, а се разгледува и идејното решение за мебелот на градската администрација.

Земјиштето на кое што се наоѓаат градските бараки е на Република Македонија. Се уште не се знае што е планирано да се гради на нивно место. ДУП-от за тој реон е во мораториум.

Изградбата на Градската куќа чини 21 милиони евра. За изградба на објектот Град Скопје склучи договор од 15 милиони евра со „Бетон“, потоа склучи и дополнителен договор од 3 милиони евра за изградба на енергетски ефикасна фасада. Шилегов од неговиот претходник ја наследи новата административна зграда изградена речиси до половина, па во април минатата година одлучи да ја доградува, со што со изведувачот „Бетон“ се договорил за дозавршување на објектот да се доплатат уште 3 милиони евра.

Во новата Градска Куќа ќе биде сместена градската администрација, градоначалникот на Скопје, како и даночните одделенија и архивата на Град Скопје. Изградена е на парцела со површина од 1.274 квадратни метри. Ќе има 6 ката, три подземни нивоа наменети за паркинг. Објектот е изграден по идејно решение на Иван Кокалановски и Борче Стојковски.