Двата универзитети на 2,3 и 4 декември во Софија ќе организираат заедничка научна интердисциплинарна конференција на тема „Димензиите на компетенциите“.

Софискиот и Битолскиот Универзитет кои од двете страни на границите, покрај академската мисија, заеднички го споделуваат и името на книжевникот, учителот, епископот Св. Климент Охридски оваа година заеднички ќе го одбележат патрониот празник – кој се празнува на 25 ноември во Република Бугарија и на 8 декември 2020 година во Република Северна Македонија, информира професорот Марјан Ѓуровски, проректор на Битолскиот универзитет.

Ректорите проф. д-р Анастас Герджиков од Софискиот Универзитет „Св. Климент Охридски“ и проф.д-р Сашо Коруновски од Универзитетот „Св. Климент Охридски“-Битола ќе имаат заеднички видео обраќања и порака. – Двата универзитети на 2,3 и 4 декември во Софија ќе организираат заедничка научна интердисциплинарна конференција на тема „Димензиите на компетенциите“ во којашто, преку заеднички научен програмски и организациски комитет, и со учество на повеќе професори со трудови и истражувања, на крајот ќе резултира со издавање заеднички зборник на трудови. Оваа активност преку заедничко соопштение ја најавуваа двата Универзитети, посочува проректорот Ѓуровски.

– Интензивирањето на академската соработка во пресрет на големиот празник на двата универзитети е во духот на европските вредности и придонесува за зајакнување на добрососедските односи. Празникот за двата универзитети претставува повод и одлична можност до академската јавност да се испратат пораки што ќе значат поттик за интензивирање на меѓусебната соработка. Додека пак зближувањето преку образованието, науката, креирањето позитивна клима и поволен концепт за поголема поврзаност преку размена на знаења, искуства, но и размена на млади, студенти и универзитетски кадри е еден од меѓусебно усогласените приоритети за време на самитот на Берлинскиот процес во Софија на којшто двете земји се во улога на домаќини, вели Ѓуровски кој го пренесува заедничкиот став на Битолскиот и Софискиот Универзитет.

Активностите во чест на заедничкиот патрон, а и други дополнителни што ќе следуваат, се врз основа на потпишаниот Меморандум за меѓусебна соработка и се дел од договорот постигнат во март оваа година за време на средбата меѓу двете универзитетски делегации во Софија, на којашто од македонска страна присуствуваа ректорот проф. д-р Сашо Коруновски и проректорот проф.д-р Марјан Ѓуровски, а од бугарска страна домаќинот – ректорот проф.д-р Анастас Герджиков и проректорот проф.д-р Николаи Витанов.

Сите овие сет од активности се во функција на зајакнување и унапредување на билатерална соработка: размена на знаења и искуства, заедничка работа во повеќе области од заеднички интерес како што се наставна,научно-истражувачка работа, публицистичка дејност, размена, мобилности на кадри и студенти, организирање гостувачки предавања, заеднички настани, конференции, тркалезни маси и други форуми, престои на визитинг професори и особено подготовка на проектни апликации и учество во заеднички проекти во рамките на европските и други програми за заедничка академска и научна истражувачка соработка, вели проректорот на УКЛО – професорот Марјан Ѓуровски